जेठ २२, डोटी ।
आज राष्ट्रिय पानी दिवस र विश्व वातावरण दिवस डोटीको सिलगढीमा पनि मनाईएको छ ।
सिलगढी खानेपानी उपभोक्ता तथा सरसफाई समिति डोटीको आयोजनामा नाचन्थलीदेखि शैलेश्वरी मन्दीर परिसरसम्म बजार सफाई गरी दिवस मनाईएको हो ।
दिवसको अवसर पारी सिलगढी खानेपानी उपभोक्ता तथा सरसफाई समितिले आफ्ना ग्राहकहरुलाई प्रति युनिटको महशुलमा रु. ५ छुट गरिएको समितिका अध्यक्ष जगत बहादुर खड्काले जानकारी दिए ।
यद्यपी समितिको नियमानुसार प्रत्येक वर्ष प्रति युनिट १० प्रतिशत महशुल वृद्धि गर्दै जाने प्रावधान रहेको सिलगढी खानेपानी उपभोक्ता तथा सरसफाई समितिका कार्यालय प्रमूख रामचन्द्र धामीले बताए । प्रत्येक आर्थिक वर्षको श्रावण महिनाबाट उक्त वृद्धि महशुल कार्यान्वयन हुने गर्दछ ।
दिवसका अवसरमा आयोजित कार्यक्रमलाई सम्बोधन गर्दै दिपायल सिलगढी नगरपालिका प्रमूख बाजी सिं खड्काले खानेपानी व्यवस्थापनका लागि नगरपालिकाले सक्दो काम गर्ने प्रतिबद्धता जनाए ।
‘पानी जीवन हो’ भन्ने मान्यतालाई आत्मसाथ गर्दै पानीको बहुउपयोगलाई ध्यानमा राखी जिल्लाकै मुटु अर्थात सदरमुकाम रहेको दिपायल सिलगढीलाई ‘शीर’ को संज्ञा दिंदै यो शीरलाई स्वच्छ राख्नुपर्नेमा उनले जोड दिए । शीर सिलगढी नै स्वस्थ नरहे शरीर अर्थात जिल्लाभरी राम्रो हुन नसक्ने उनले बताए ।
हालको पानीको श्रोतको मुहान संरक्षण र सरसफाईका साथै निर्माणधिन गैरागाउँ–सिलगढी बृहत खानेपानी योजनालाई पनि छिटो पूरा गरी त्यसबाट पनि विद्युत उत्पादन समेत गरेर सिलगढी–खप्तड केवलकार सञ्चालन गर्न सकिने उनको तर्क थियो ।
त्यस्तै दिपायल सिलगढी नगरपालिका उप–प्रमूख कल्पना साउँदले दिवसका अवसरमा गरिएको सरसफाई कार्यक्रमबाट स्थानीयबासीलाई सन्देश दिन खोजिएकोमा सबैले वातावरणीय सरसफाईमा जोड दिनुपर्ने बताईन् ।
यसै गरी दिपायल सिलगढी नगरपालिका वडा नं. ६ का वडा अध्यक्ष नरेश मलासीले आफु भर्खरै निर्वाचित भएर आएको हुँदा लगत्तै सिलगढी खानेपानी उपभोक्ता तथा सरसफाई समिति, दिपायल सिलगढी नगरपालिका, खानेपानी र वातारवरण सरसफाईका क्षेत्रमा क्रियाशील संघसँस्थाहरुबिच समन्वयात्मक बैठक बसी खानेपानी व्यवस्थापन र वातावरणीय सरसफाई कसरी प्रभावकारी बनाउन सकिन्छ भन्नेबारे योजना बनाउने आफ्नो सोच रहेको बताए ।
स्वच्छ खानेपानी पिउनाले मानिसमा झण्डै ८० प्रतिशत रोगहरु नलाग्ने अध्ययनले देखाएको हुँदा सबैले यसमा ध्यान दिनुपर्नेमा उनले जोड दिए ।
सिलगढी खानेपानी उपभोक्ता तथा सरसफाई समितिले दिपायल सिलगढी नगरपालिकाका नवनिर्वाचित नगर प्रमूख बाजी सिं खड्का, उप–प्रमूख कल्पना साउँद र वडा नं. ६ का वडा अध्यक्ष नरेश मलासीलाई टिका, माला तथा खादा ओढाएर बधाई तथा सम्मान पनि गरेको थियो ।
सरसफाई कार्यक्रममा स्थानीय जनप्रतिनिधी, सिलगढी खानेपानी उपभोक्ता तथा सरसफाई समितिका पदाधिकारी तथा कर्मचारी, जिल्ला प्रहरी कार्यालयका प्रहरीको टिम, पत्रकारहरुको सहभागिता रहेको थियो ।
