आज घटस्थापना, घर घरमा जमरा राखिदै, नवरात्रको पहिलो दिन माता शैलपुत्रीको पूजा गरिँदै

✍️ झलक पाली 📅 ६ आश्विन २०८२, सोमबार १६:०८

आश्विन शुक्ल प्रतिपदादेखि सुरु हुने महान् चाड दसैँ आज घटस्थापनासँगै आरम्भ भएको छ । यस दिन घर–घरमा पवित्र कलश स्थापना गरी अखण्ड ज्योति बालिन्छ र नौ दिनसम्म दुर्गा भवानीको आराधना गरिन्छ । भक्तजनहरूले उपवाससहित श्रद्धा र भक्तिले पूजा गर्ने परम्परा रहेको छ ।

सूर्योदयदेखि १० घडीभित्र माङ्गलिक स्नान गरी पूजाघर वा दसैँघरलाई शुद्ध माटो वा गाईको गोबरले पोतेर कलश स्थापना गरिन्छ । पवित्र जलले भरिएको कलशमा पञ्चपल्लव राखी शंख, घण्टी र डमरु बजाउँदै चण्डी पाठसहित दुर्गा भवानीको आवाहन गरिन्छ ।

शारदीय नवरात्रको पहिलो दिन घटस्थापना गरी देवी शैलपुत्रीको पूजा आराधना गर्ने परम्परा छ । शैलपुत्री देवी दुर्गाका नौ रूपमध्ये पहिलो रूप मानिन्छिन् । पुराणअनुसार उनी पर्वतराज हिमालयकी पुत्री भएकी कारण शैलपुत्री नामले चिनिन्छिन् ।

नवरात्रको प्रारम्भमा स्नानादि नित्यकर्मपछि शुद्ध स्थानमा शैलपुत्रीको तस्बिर स्थापना गरी धान, जौँ, तिल, कुश, पञ्चामृत, फलफूल, धूप, बत्ति आदिले पूजा गर्ने चलन छ । ॐ देवी शैलपुत्र्यै नमः मन्त्र जप गरी कलश पूजन सम्पन्न गरिन्छ ।