कार्तिक २०, डोटी ।
डोटीको पूर्वीचौकी गाउँपालिका, स्वास्थ्य शाखा प्रमूख राजु खड्कामा कोरोना संक्रमण देखिएको छ । उनलाई विहीबार कोरोना पोजेटिभ देखिएको हो ।
जिल्लाका ९ वटा स्थानीय तहका स्वास्थ्य शाखाहरु मध्ये एउटा मात्रै महिला शाखा प्रमूख रहेको पूर्वीचौकी गाउँपालिकालाई कोरोना संक्रमण मुक्त गराउन सफल भएपश्चात खड्का आफैलाई संक्रमण देखा परेको हो ।
आफुलाई सामान्य रुघा ज्वरो आएपछि पीसिआर परीक्षण गर्दा कोरोना पोजेटिभ देखिएको खड्काले बताईन् ।
हालसम्म पूर्वीचौकी गाउँपालिकामा १ सय ५८ जना मानिसहरुलाई कोरोना संक्रमण देखा परेको छ । तर सबै जना निको भई गत असोज ३० गतेपश्चात पूर्वीचौकी गाउँपालिका अहिले कोरोना मुक्त रहेको छ ।
विहीबार खड्कासँगै दिपायल सिलगढी नगरपालिका वडा नं. ५ का थप दुइ जना पुरुष गरी डोटीमा ३ जनामा कोरोना संक्रमण पुष्टी भएको हो ।
डोटीमा हालसम्म कूल १ हजार २ सय ९४ जनामा कोरोना संक्रमण देखिएको छ । जसमध्ये ७० जना कोरोना भाईरसका सक्रिय बिरामी रहेको स्वास्थ्य कार्यालय डोटीले जनाएको छ ।
