शिव ओली/मंसिर १७, डोटी ।
डोटीको जोरायल गाउँपालिका वडा नं. २ स्थित बुडर खेलमैदानमा सुदूरपश्चिम प्रदेश स्तरीय शैलेश्वरी जोरायल फुटबल कप २०७७ को बुधबार समुद्घाटन भएको छ ।
जोरायल गाउँपालिकाको आयोजनामा सञ्चालित प्रतियोगिताको गाउँपालिका अध्यक्ष दुर्गादत्त ओझाले समुद्घाटन गरेका छन् ।
समुद्घाटन कार्यक्रमलाई संवोधन गर्दै अध्यक्ष ओझाले जोरायल गाउँपालिका खेल र खेलाडीप्रति संवेदनशील रहेको बताएका छन् । साथै सुदूरपश्चिमको मुटुमा पर्ने बुडर खेलमैदानको तुरुन्तै डिपिआर गरी स्तरोन्नती गर्न र जोरायल गाउँपालिकालाई चिनाउने गरी पहलकदमी गरिरहेको उनले बताए ।
उक्त प्रतियोगिताका विजेताले रु. १ लाख ११ हजार १ सय ११ नगद सहित ट्रफि, मेडल प्रमाण पत्र तथा उप–विजेताले रु. ५५ हजार ५ सय ५५ नगद सहित ट्रफि, मेडल प्रमाण पत्र प्राप्त गर्नेछन् ।
नक आउट चरण खेलाईएको खेलमा सुदूरपश्चिमका डोटी, कैलाली, अछाम र बाजुराका गरी जम्मा ११ वटा टिमको सहभागिता रहेको खेलकुद प्रतियोगिताका संयोजक पवन कुमार शाहुले जानकारी दिए ।
यहि मंसिर २१ गतेसम्म सञ्चालन हुने प्रतियोगिताको पहिलो दिन भएको खेलमा युनिक युथ स्पोर्टस् क्लब जोरायल र जेएससी डोटीबिच भएकोमा जेएससीले युनिक युथ स्पोर्टस् क्लबलाई ३–० ले पराजित गरेको छ ।
भोलि विहीबार बिहान रानीवन स्पोर्टस् क्लब बाजुरा र राजधानी युवा क्लब अत्तरीया, कैलालीबिच हुने आयोजकले जनाएको छ ।
जोरायल गाउँपालिका वडा नं. २ का वडा अध्यक्ष मान बहादुर मल्लको अध्यक्षतामा सम्पन्न खेल प्रतियोगिताको समुद्घाटन कार्यक्रममा प्रमूख अतिथि जोरायल गाउँपालिकाका अध्यक्ष दुर्गादत्त ओझा, विशिष्ट अतिथिमा उपाध्यक्ष जमुना बोहरा लगाएतको सहभागिता रहेको थियो ।
