झलक पाली/प्रेम नेपाली
श्रावण ७, डोटी ।
नेकपा एमाले डोटीले नेपाल कम्युनिष्ट पार्टीका सँस्थापक एवं तत्कालीन महासचिव पुष्पलाल श्रेष्ठको ४३ औं स्मृति दिवस विहीबार विभिन्न रचनात्मक कार्यक्रम गरेर मनाएको छ ।
दिवसको अवसरमा एमालेले सुदूरपश्चिमको प्रसिद्ध धार्मिक शक्तिपीठ सिलगढीमा रहेको शैलेश्वरी मन्दिर परिसर लगाएत अन्य धार्मिक क्षेत्र र सडक क्षेत्रमा १ सय वटा रुद्राक्ष तथा अन्य प्रजातीका बोटबिरुवा समेत गरेर जम्मा २ सय ५० वटा बिरुवा रोपेको छ ।
वृक्षारोपण कार्यक्रमको थालनी नेकपा एमालेका वयोवृद्ध नेता ७५ वर्षिया सहदेव खाँतीले शैलेश्वरी मन्दिर परिसरमा रुद्राक्षको बोट रोपेर शुभारम्भ गरेपछि अन्य सहभागिहरुले वृक्षारोपण गरेका थिए ।
त्यस्तै एमालेले जिल्ला कारागार डोटीमा रहेका ५७ जना कैदीबन्दी, जिल्ला अस्पताल डोटीमा बेड भर्ना भएका १० जना र पुज्यधर्मान्तक बृद्धाश्रम डोटीमा आश्रय लिईरहेका ३ जना गरि ७० जना मानिसहरुलाई फलफूल तथा जुस वितरण गरेको छ ।
एमाले डोटीका अध्यक्ष चक्र मल्लको नेतृत्वमा वृक्षारोपण तथा फलफूल वितरण गरिएको हो ।
कार्यक्रममा एमाले डोटीका जिल्ला स्तरीय नेता, विभिन्न भातृ संगठनका नेता कार्यकर्ता र पत्रकार लगाएतको सहभागिता रहेको थियो ।
