असोज ५, डोटी ।
डोटीमा सुदूरपश्चिम प्रदेश स्तरिय खप्तड–शैलेश्वरी गोल्डकप प्रतियोगिता २०७९ आयोजना हुने भएको छ ।
सिलगढीमा रहेको भैरवप्रसाद गण, दिपायल सिलगढी नगरपालिका वडा नम्बर–६ र जिल्ला अस्पताल डोटीको संयुक्त आयोजनामा प्रतियोगिता सञ्चालन हुनेछ ।
हिन्दुहरुको महान चाड दशैं र तिहारको अवसरमा यही असोज ८ गते देखी १० गतेसम्म सिलगढीको टुडिखेलमा प्रतियोगिता हुने बुधबार आयोजित पत्रकार सम्मेलनमार्फत जानकारी दिइएको छ ।
गोल्डकप प्रतियोगितामा विजेता टिमलाई नगद रु. १ लाख तथा उप-विजेता टिमलाई नगद रु. ५० हजार सहित ट्रफि र प्रमाण-पत्र प्रदान गरिने भैरवप्रसाद गणका गणपति जनमत बहादुर कार्कीले जानकारी दिए ।
डोटी जिल्लामा पहिलो पटक आयोजना हुने गोल्डकप प्रतियोगितमा डोटी, डडेल्धुरा, कैलाली, बाजुरा, अछाम, बैतडी, भैरवप्रसाद गण र डोटी उद्योग वाणिज्य संघको टिम गरि जम्मा ८ वटा टिम सहभागिता हुनेछन् ।
प्रतियोगिताको लागि दिपायल सिलगढी नगरपालिका-६ ले नगद रु. १ लाख सहित व्यवस्थापन सहयोग रहेको सो वडाका वडा सचिव एवं नेपाल भलिबल संघका केन्द्रीय सदस्य राज बहादुर खड्काले बताए ।
त्यस्तै जिल्ला अस्पतालले नगद रु. ५० हजार सहित व्यवस्थापन, स्वास्थ्यकर्मी सहितको सहयोग गर्ने अस्पतालका अध्यक्ष धन बहादुर नेपालीले बताए । बाँकी व्यवस्थापन भैरवप्रसाद गणले गर्ने जनाइएको छ ।
सुदूरपश्चिमका सबै जिल्लाका खेलाडीहरु जम्मा पारेर खेलकुद विकास सङ्गै यहाँको कला संस्कृती देखाउनुको साथै सिलगढीका परम्परागत घरहरूमा होमस्टेको प्रर्बद्धन गर्ने पनि उद्धेश्य रहेको भैरवप्रसाद गणका गणपति कार्कीको भनाइ छ । जिल्ला बाहिरबाट आउने खेलाडीहरुलाई खाना, बसोबास तथा यातायातको समेत व्यवस्था गरिएको उनले बताए ।
जिल्लामै पहिलो पटक गोल्डकप फुटबल प्रतियोगिता आयोजना गरिएको र यसलाई सफल पार्न सबैले सहयोग गर्नुपर्ने दिपायल सिलगढी नगरपालिका–६ का वडा अध्यक्ष नरेश मलासीले जोड दिए । जिल्ला खेलकुद समिति डोटीका पूर्व अध्यक्ष र राष्ट्रिय खेलाडी समेत रहेका मलासीले डोटीमा खेल क्षेत्रमा विकास गर्न केन्द्र र प्रदेश सरकारले ध्यान दिन नसकेको पनि बताए ।
शैलेश्वरी मन्दिर प्राङ्गणमा पत्रकार सम्मेलनमा डोटी जिल्लामा क्रियाशील विभिन्न सञ्चारकर्मीहरु सहभागी रहेका थिए ।
पत्रकार सम्मेलनमा दिईएको छोटो जानकारी भिडियोमा हेर्नुहोस :