डोटीमा एस.इ.इ. २०८१ का लागि १५ परीक्षा केन्द्रबाट ४,०७५ विद्यार्थी परीक्षा दिंदै

फाल्गुन १३, डोटी ।

आगामी चैत्र ७ गतेबाट हुने एस.इ.इ.परीक्षा २०८१ का लागि डोटीमा १५ वटा परीक्षा केन्द्र तोकिएको छ । यस वर्ष डोटी जिल्लाबाट जम्मा ४ हजार ७५ जना विद्यार्थीले परीक्षा लिने शिक्षा विकास तथा समन्वय इकाइ डोटीले जनाएको छ ।
उक्त कार्यालयको फेसबुक पेज Edcu Doti मार्फत सार्वजनिक गरिएको विवरण अनुसार नियमिततर्फ ३ हजार ३५ जना, आर्थिक वर्ष २०७८/०७९ पहिलेका ग्रेडवृद्धितर्फ १९ जना र २०८० को ग्रेडवृद्धितर्फका १ हजार २१ जना परीक्षार्थी रहेका छन् ।
पुर्विचौकीको सानागाउँस्थित सरस्वती माध्यमिक विद्यालय परीक्षा केन्द्रमा विभिन्न ८ विद्यालयका ३३२ जना, दिपायल सिलगढी नगरपालिकाको सिलगढीस्थित पद्म पब्लिक मुक्ति नारायण मा. वि. (क) केन्द्रमा विभिन्न ११ विद्यालयका ४०४ जना परीक्षार्थि सहभागि हुनेछन् ।
त्यस्तै दिपायलस्थित दिल्पेश्वर मा. वि. केन्द्रमा ८ वटा विद्यालयका ४३० जना, राजपुरस्थित सुजङ्ग इङ्गलिस बोर्डिङ्ग केन्द्रमा ९ विद्यालयका ४०७ जना, सायलको ओम आधारभूत विद्यालय केन्द्रमा ५ विद्यालयका २२१ जना परीक्षार्थी सहभागि हुनेछन् ।
यता आदर्शको मौवास्थित शारदा मा. वि. केन्द्रमा १० विद्यालयका २९० जना, के.आई.सिंहको वायलस्थित झिमेमालिका मा.वि. केन्द्रमा ७ विद्यालयका २२९ जना, बोगटानको खत्याडी मा.वि.केन्द्रमा ७ विद्यालयका १४८, शिखरको गोपघाटस्थित राधाकृष्ण मा.वि.केन्द्रमा ११ विद्यालयका ३७८ जना परीक्षार्थी सहभागि हुँदैछन् ।
यसैगरी जोरायलको बुडरस्थित रामपुर मा.वि. केन्द्रमा ३ विद्यालयका १९१ जना,
विपिनगर लमौतेस्थित दुर्गा मा.वि. केन्द्रमा ८ विद्यालयका २७२ जना, बडिकेदारको बर्छैन मा.वि.केन्द्रमा ९ विद्यालयका २३६ जना र शिखरको तल्कोटस्थित हरिहर मा.वि. केन्द्रमा ६ विद्यालयका ३५५ जना विद्यार्थीले परीक्षामा भाग लिंदैछन् ।
यता पद्म पब्लिक मुक्तिनारायण मा.वि. (ख) केन्द्रमा प्राविधिक धारतर्फका विभिन्न ५ विद्यालयका १६३ जना विद्यार्थी र पद्म पब्लिक मुक्तिनारायण मा.वि.(ग) केन्द्रमा ग्रेडवृद्धितर्फका १९ जना परीक्षार्थी सहभागि रहने जनाईएको छ ।

एस.इ.इ.परीक्षाका लागि सबै तयारीहरु भैरहेको शिक्षा विकास तथा समन्वय इकाइ डोटीमा कार्यरत प्राविधिक सहायक पदम साउँदले जानकारी दिए।

कुन परीक्षा केन्द्रमा, कुन विद्यालयका, कति परीक्षार्थी ? सबै हेर्नुहोस् –