भाद्र १६, डोटी ।
डोटीको जोरायल गाउँपालिका ५ गड्सेराका समाजसेवी युवा शेरबहादुर बोगटीले आफ्नो जन्मदिन फरक र उदाहरणीय ढङ्गले मनाएका छन्।
उनले मंगलबार आफ्नो ३२ औं जन्मदिनको अवसरमा आफुले पनि पढेको स्थानीय जनप्रिय आधारभूत विद्यालयमा अध्ययनरत १९६ जना विद्यार्थीलाई सहभोज गराएका हुन् ।
जन्मदिनको नाममा अनावश्यक फजुल खर्च गर्नुभन्दा विभिन्न जिल्लाबाट आएर सो विद्यालयमा अध्ययन गरिरहेका साना विद्यार्थीहरूसँग खुसी साट्नु उपयुक्त ठानेर सहभोज आयोजना गरिएको युवा बोगटीले बताए।
औपचारिक तथा भड्किलो रूपमा जन्मदिन मनाउने प्रचलन बढिरहेका बेला स्थानीय युवाले देखाएको यो सामाजिक उत्तरदायित्व र सकारात्मक कदमको स्थानीय तहमा निकै प्रशंसा भइरहेको छ।
युवा बोगटी नेकपा एमाले जोरायल गाउँपालिका ५ नम्बर वडा कमिटी अध्यक्ष पनि हुन् ।
पछिल्लो केहि वर्ष यता विशेषगरी वर्षातको बेला जोखिम मोल्दै र अन्य सिजनमा पनि अफ्ट्यारोमा परेका स्थानीय जो कोही मानिसलाई बाइक यात्रा गराएर गन्तव्यमा पुर्याउने कामले चर्चामा छन् ।
यसका साथै ऊनी स्थानीय स्तरमा विभिन्न विकास निर्माणका कामसङ्गै जोडिएर समाजसेवा गर्दै आएका छन् ।
